नेसं ११४६ यंलागा ८, येँ । ह्याउँनिभाः अनुसन्धान केन्द्रं ह्याउँनिभाः जर्नल, थीथी खुथी सफू व ह्याउँनिभाः इसफूपसः पितबिल । थौं केन्द्रया निक्वःगु दँमुँज्याय् थुकथं पितब्वःगु खः । ज्याझ्वलय् विद्यावारिधि यानाः नेवाः प्राज्ञिक ख्यलय् योगदान बियाच्वंपिं १५ म्ह डाक्टरपिन्त नं हन ।
ज्याझ्वःया सभानायः अनुप सिं सुवालं ह्याउँनिभाः जर्नल एम. फिल. व पि. एच. डि. यानाच्वंपिं शोधार्थीयात लक्षित यानाः उमिगु सहजताया लागिं पिथनागु खँ कनादिल । इसफूपसलं सफू च्वइपिं श्रष्टायात सहज याइगु भलसा कयादिल । नेवाः प्राज्ञिक ख्यलय् समर्पित डाक्टरपिंलिसे सहकार्य यानाः ह्याउँनिभाःया प्रमुख लक्ष नेवाः इकोनोमिक्स अवधारणा परिमार्जित यायेफैगु, नेवाः समाज सामाजिक, राजनैतिक व आर्थिकरुपं सक्षम दयेकेगु सुत्र लुइकेफैगु भलसा कयादिल । केन्द्रयाके दुगु थीथी परियोजना ताःलाकेत नेवाः प्राज्ञिक व्यक्तित्वपिंसं बौद्धिक नेतृत्व बीगु भलसा कयादिल ।
ज्याझ्वलय् प्रा. डा. कृष्ण हाछेथु, प्रा. डा. चुन्दा बज्राचार्य, प्रा. डा. चन्द्रमान बज्राचार्य, प्रा. डा. ओमकारेश्वर श्रेष्ठ, प्रा. डा. सावित्री कक्षपति, प्रा. डा. अरहन स्थापित, डा. गोपाल धौबञ्जार, सहप्रा. डा. टिकाराम पौडेल, उपप्रा. डा. सुदीप सिं नकःमि, व उपप्रा. डा. राजीव रञ्जितयात ज्याझ्वःया मूपाहाँ समिता खड्गी श्रेष्ठ व केन्द्रया पदाधिकारीपिंसं हनादीगु खः । डाक्टरपिन्त केन्द्रं याःगु हनेज्याया सन्दर्भय् केन्द्रया दांभलिं अच्युत बज्राचार्यं जःह्वलादीगु खः । डा. कृष्ण हाछेथुं ह्याउँनिभाः अनुसन्धान केन्द्रलिसे थः सहकार्य यायेन्ह्याःगु खँ कनादिल । डा. चुन्दा बज्राचार्यं ह्याउँनिभालं स्थापनाकालंनिसें याःगु ज्या च्वछासें अनुसन्धान ख्यलय् नं थःत तब्या याःगुलिं नेवाः अनुसन्धानय् तिबः जुइगु खँ कुलादिल ।
ज्याझ्वलय् न्याथी सफू व इसफूपसः ज्याझ्वःया मूपाहाँ नं पितब्वयादिल । पूर्णिमा शाक्यया मतिनाया हाइकु सफुती न्याम्ह समालोचकं समालोचना याःगु मतिनाया ख्वबि (हाइकु) दुवाला, ओमकारेश्वर श्रेष्ठया नेवाः कुनाबिना, अनुप सिं सुवालया अनौपनिवेशिकृत आदिवासी शिक्षाशास्त्र, अनुप सिं सुवालका तीन नाटक व कोसल्वहँ व मेमेगु नाटक पितबिउगु खः । ज्याझ्वलय् ह्याउँनिभाःया संरक्षक मनराजा रञ्जितं इसफूती गुकथं सफू न्यायेगु कनादिल ।
केन्द्रया ह्याउँनिभाः जर्नल ल्याः १ जर्नलया सम्पादकपिंसं व मूपाहां नं मंकाःकथं यानादिल । जर्नलया मूसम्पादक प्रा. डा. ओमकारेश्वर श्रेष्ठं जर्नलया आइ एस एन एन वःसां डि ओ आइ कायेत ततःमतःक्यंकूगु खँय् दुख प्वंकादिल । जर्नलं नेवाः अध्येतापिन्त तिबः बीगुलिसें थुकिं नेवाः अनुसन्धानयात तब्याकीगु भलसा क्यनादिल ।
ज्याझ्वलय् केन्द्रं न्ह्याकूगु प्राज्ञिक लेखन ज्याझ्वलय् ब्वति काःपिन्त दसिपौ नं लःल्हाःगु खः । प्रशिक्षणय् ब्वतिकाःपिन्त केन्द्रया मूदुजः रितेश मल्लं सुभाय् बियादिल । दसिपौ मूपाहां श्रेष्ठं इनादीगु खः । मूपाहाँ श्रेष्ठं केन्द्रलिसे स्वानाः थम्हं नं नेवाः प्राज्ञिक ख्यलं छुं सयेकेखंगु प्रसंग कुलादिल । केन्द्रया प्राज्ञिक ज्यां देस व नेवाः समाजयात भिंकीगु मनंखंगुलिं मेगु दँय् नं केन्द्रया लागि फूचाःकथं माःगु गुहालि यायेगु प्रतिवद्धता प्वंकादिल ।
ज्याझ्वलय् लसकुस न्वचू सचीब योेगेन्द्र राजकर्णिकार, सुभाय् न्वचू उपाध्यक्ष मनरा प्रजापतिं बियादीगु खः । ज्याझ्वः केन्द्रया मूदुजः पूर्णिमा शाक्यं न्ह्याकादीगु खः ।
