ने.संं ११४५ बछलाथ्व ५, यल । काठमाडौं विश्वविद्यालयं नेपालभाषां दच्छिया शिक्षा शाश्त्रय् स्नातक तगिं (One Year B. Ed) कक्षा न्ह्याकेत्यंगु दु । थुगु खँ थुगु विश्वविद्यालयया भाषा व शिक्षा विभागं वंगु बुधवाः ग्वसाःग्वःगु नेवाः न्ह्यलुवाःलिसे साक्षात्कार ज्याझ्वलय् जानकारी ब्यूगु खः ।
थुगु ज्याझ्वलय् थुगु विश्वविद्यालयया लागिं पाठ्यक्रम तयार यानादीम्ह प्रा.डा. ओमकारेश्वर श्रेष्ठ, विश्वविद्यालय डीन प्रा.डा. बालचन्द्र लुँइटेल, प्रा.डा. हेमराज काफ्लें अध्यापनयात कयाः ध्वाःथुइकादीगु खः ।
ज्याझ्वलय् नेपालभाषा एकेदेमि चान्सलर मल्ल के सुन्दर, ३ नं प्रदेशया सांसद रामकृष्ण चित्रकार, नेपालभाषा केन्द्रीय विभाग प्रमुख सप्राडा. राजनलाल जोशी, शिक्षक सेवा आयोगया उपसचिव गणेशप्रसाद पौडेल, नेवाः देय् दबू नायः पवित्र बज्राचार्य, भाषा आयोग दुजः सुरेश मानन्धरं नं अध्यापनया थीथी पक्षयात कयाः नवानादीगु खः ।
थुगु शिक्षण ज्याझ्वलय् न्ह्यागुं विषय कयाः स्नातक तगिं उतिर्णपिंसं ब्वति कायेफैगु विश्वविद्यालय प्रशाशनं धाःगु दु । अध्यापन दच्छिया दुने निगू सेमेस्टरं क्वचाइ । कक्षा अनलाइनपाखें जुइ । परिक्षा भौतिक कक्षाय् जुइ । मुक्कं ज्याझ्वः १ लख ४० हजार तका तुइ । विश्वविद्यालयपां तामाङ भाषां नं बि. एड. ब्वंकेत्यंगु दु ।
ज्याझ्वलय् विद्यालय तगिमय् नेपालभाषा व तामाङ भाषा अध्यापन यानाच्वंपिं शिक्षण सहायकपिन्त लक्षित यानाः थुगु ज्याझ्वः पितब्यूगु जानकारी ब्यूगु दु ।