नेसं ११४६ अनलाथ्व ५, यल । काठमाडौं विश्वविद्यालयं नेवाः राष्ट्रिय व अन्तराष्ट्रिय संगठनलिसे सहलह ब्याकूगु दु । म्हिगः नेवाः देय् दबू व थौं वर्ल्ड नेवाः अर्गनाइजेसनलिसे सहलह ब्याकुगु खः । सहलह विश्वविद्यालयं न्ह्याकाच्वंगु नेपालभाषा अध्यापनय् सामाजिक सरोकार विषयस केन्द्रित जूगु खः ।
नेवाः देय् दबूलिसे जूगु सहलह देशन्यंकं माःगु नेवाः भाषा प्रशिक्षक व अनुवादक जनशक्ति उत्पादन यायेत का.विं. विशेष कोर्स न्ह्याकेगु खँय् केन्द्रित जूगु खः । वर्ल्ड नेवाः अर्गनाइजेसनं नेपालभाषा शिक्षणयात हलिंन्यंकं प्रचार यायेत का.वि. लिसे सहकार्य यायेगु खँय् सहलह ब्याकूगु दु । विश्वविद्यालयं नकतिनि पितब्यूगु ३ क्रेडिट घण्टाया नेपालभाषा आधारभूत कक्षायात विश्वब्यापी प्रवर्द्धन सञ्चालन यायेत वर्ल्ड नेवा: अर्गनाइजेसनं ग्वाहालि यायेगु खँय् सहलह केन्द्रित याःगु खः । का.वि. वर्ल्ड नेवा: अर्गनाइजेसनया दथुइ सम्झौता जुइधुंका: थ्व परियोजना न्ह्याइ धाःगु दु ।
म्हिगः नेवाः देय् दबूया केन्द्रिय अध्यक्ष रश्मिला प्रजापति श्रेष्ठया नेतृत्वय् वःगु दबूया वरिष्ठ न्वकू सत्यनारायण डंगोल, न्वकू उमेश स्थापित छ्याञ्जे श्रीजन श्रेष्ठ, स्वनिगः विशेष प्रदेश अध्यक्ष न्हुच्छे बहादुर महर्जन व स्यनामि दबूया अध्यक्ष रितेश मल्ल दुथ्याःगु पुचःलिसे का.वि. शिक्षण विभाग प्रमुख प्रा.डा. टिकाराम पौडेल, सप्रा. डा. राजीब रञ्जित, प्रा.डा. अोमकारेश्वर श्रेष्ठ व अनुप सिं सुवालया दथुइ सहलह जूगु खः । थौं वर्ल्ड नेवाः अर्गनाइजेसनया केन्द्रि न्वकू द्वय विमल श्रेष्ठ व सुरेन्द्र भक्त श्रेष्ठं सहलहखय् ब्वति कयादीगु खः ।
का.विं नेपालय् दकले न्हापां शिक्षाशास्त्रय् नेपालभाषां दछिया स्नातक कक्षा न्ह्याकाच्वंगु दु । वयेत्यंगु जुनय् कक्षा न्ह्याकेगु ल्याखं ३ क्रेडिट घण्टाया नेपालभाषां अाधारभूत कक्षा नं न्ह्याकेत्यंगु दु ।
