काैलागा ६, ख्वप । ख्वप जिल्ला प्रशासनया ज्याकूया साइनबोर्डय् रञ्जना लिपिं च्वयेत ध्यानाकर्षण याःगु दु । नेवाः देय् दबू ख्वप जिल्ला समिति व ख्वप नगर समितिया ग्वसालय् ख्वप जिल्ला प्रशासनया प्रमुख रोशनी कुमारी श्रेष्ठयात वय्कःया हे ज्याकुथी नापलानाः थथे ध्यानाकर्षण याःगु खः । वहे इलय् नवनियुक्त प्रमुख श्रेष्ठयात सगं नापं धौ सगं बियाः भिंतुना पौ लःल्हानाः भिंतुना देछाःगु खः ।
उगु ज्याझ्वलय् नेवाः देय् दबूया केन्द्रीय न्वकू खगेन्द्र श्रेष्ठं नेवाःत कर्मचारी क्षेत्रनिसें हरेक क्षेत्रय् न्ह्याः वनेमाःगु खँय् बः बियादिल । ज्याझ्वलय् नेवाः देय् दबू स्वनिगः विशेष प्रदेशया नायः श्रीकृष्ण महर्जनं ख्वप जिल्लाया प्रशासनय् स्थानीयपिन्त खँय् भाय् ल्हाये मसःगुलिं समस्या जूगु कुलादिसें भाषाया कारणं समस्या मजुइगु वातावरण तयार यायेमाःगु खँय् बः बियादिल । वय्कलं ख्वप जिल्ला प्रशासनया ज्याकुथिइ रञ्जना लिपि नं छ्यलेत ध्यानाकर्षण यानादिल । नेवाः देय् दबू ख्वप जिल्लाया नायः नरेश नेवालं ३ नं प्रदेशय् तकं नेवाः भाय् कामकाजि भाषा जुइ धुंकूगुलिं नेपालभाषायात थःगु मातहतया लागाय् छ्यलेगु बातावरण दयेकेत माग यानादिल । ख्वप जिल्ला प्रशासन ज्याकू प्रमुख रोशनी कुमारी श्रेष्ठं समुदायया भावनाकथं थः न्ह्याःवनेगु बचं बियादिल ।
उगु नापलायेगु ज्याय् देय् दबूया केन्द्रीय दुजः अनिल लेकाली, स्वनिगः विशेष प्रदेशया छ्याञ्जे हरिबहादुर श्रेष्ठ, ख्वप नगर समितिया नायः कृष्ण प्रसाद प्रजापति, मिसा दबू व थीथी तहया प्रतिनिधिपिसं ब्वति कयादीगु खः ।