नेसं ११४५ बछलागा १४, येँ । नेवाः देय् दबूया थौंनिसें स्वन्हुयंक न्ह्यायेत्यंगु च्याक्वःगु अधिवेशन मयायेत उच्च अदालतं अन्तरिम आदेश जारी याःगु दु । थुगु आदेश थौं न्हिनय् न्यायाधीश ऋषि राजभण्डारीया एकल इजलासं जारी याःगु खः ।
पोखराया प्रकाशमान पालिखें जिल्ला प्रशाशन कार्यालय येँ समेतयात विपक्षी दयेकाः तःगु उत्प्रेरणया रितय् थौं वहस जूगु खः । पालिखेपाखें अधिवक्ता चन्द्र प्रसाद गुरागाइं वहस यानादीगु खः । निवेदकं अन्तरिम आदेश जारी यायेत माग याःगु लिधंसाय् आ: वइगु जेठ १२ गते निगुलिं पक्षलिसे सहलह यायेगु पेशी तःगु दु । उबलय् तक देय् दबूया महाधिवेशन मयायेत अदालतं अन्तरिम आदेश जारी याःगु खः ।
देय् दबूया संस्थापक मध्य छम्ह नरेशवीर शाक्यं देय् दबू विधानसम्मत न्ह्यानामच्वंगुलिं उकियात भिंकेत थ्व मुद्दा तःगु जानकारी बियादीगु दु । वय्कलं देय् दबूया संस्थागत व व्यक्तिगत संस्थापकतय्त महाधिवेशनय् ब्वति जक कायेकाः उम्मेदवार जुइगु अधिकारं वञ्चित याइगु नियमावलि दयेकाः अलोकतान्त्रिक ज्या याःगुलिं थःपिं थ्व पलाः छीत बाध्य जूगु धयादीगु दु । संस्थापक सदस्यतकं मखुपिन्त तकं दबूया संरक्षक दयेकातःगुलिइ नं थःपिनि च्यूताः दूगु कनादीगु दु ।
दबूया व्यक्तिगत संस्थापकपिं प्रकाश पालिखे, नरेशवीर शाक्यया सक्रियताय् थ्व अदालति प्रकृया न्ह्याःगु जानकारी वःगु दु । छुं न्हिं न्ह्यव थ्व हे पुचलं जिल्ला प्रशाशन कार्यालय येँय् महाधिवेशन दिकेत उजुरी तःगु खः । उगु उजुरीया लिधंसाय् दे दबूया महाधिवेशनया लागिं नायः पदय् उम्मेदवारी ब्यूपिं प्यम्हेसितं नापं तयाः सहलह याःगु खः । उगु सहलहखय् छुं निष्कर्श पिहाँ मवःगुलिं थ्व पुचः अदालति प्रकृयाय् वंगु धाःगु दु ।
लुमंकेबह जू, दबूया १९ म्ह व्यक्तिगत संस्थापक मध्य न्याम्ह जक जीवित दनि ।