नेसं ११४५ चिल्लागा १, बोडे । नेवाः देय् दबू स्वनिगः प्रदेशया अधिवेशनं नविन थेच्वमियात सर्वसम्मतिं नायः ल्यःगु दु । थौं जूगु अधिवेशनया वन्द सत्रं ३३ म्ह जः दूगु कार्य समिति दयेकाः भाजु थेच्वमियात नायः ल्यःगु खः ।
अधिवेशनं गणेशराम श्रेष्ठ वरिष्ठ न्वकू, गंगादेवी महर्जन मिसा न्वकू, सुमन श्रेष्ठ न्वकू, शोभा बज्राचार्य महर्जन मुख्य सचिव, मनरा प्रजापति मिसा सचिव पदय् ल्यःगु दु । दुजलय् नानीहेरा महर्जन, धर्म देव महर्जन, सरल गोपाल महर्जन, केशव महर्जन, लगायत सर्वसम्मतिं ल्यःगु दु ।
उमेश स्थापितया संयोजकत्वय् सत्य नारायण डंगोल व मचाराजा महर्जन दुथ्याःगु निर्वाचन समितिं अधिवेशनय् ल्यज्या क्वचायेकूगु खः । अधिवेशनं शरण गोपाल डंगोल, प्रदीप डंगोल, जय दुवालयात दबूया राष्ट्रिय परिषद् दुजः ल्यःगु खः । अधिवेशनं २० म्ह महाधिवेशन प्रतिनिधि नं ल्यःगु दु । अनुप सिं सुवाल, माधव श्रेष्ठ, मनरत्न शाक्य, अनिल स्थापित, नरेश श्रेष्ठ, श्रीकृष्ण महर्जन, राकेश मान मास्के, नीलकण्ठ महर्लिजन लिसें मेपिं नं सर्वसम्मतं महाधिवेशन प्रतिनिधि ल्यःगु खः ।
ज्याझ्वःया उद्घाटन सत्र श्रीकृष्ण महर्जनया सभापतित्वय् न्ह्याःगु खः । ज्याझ्वलय् मूपाहाँ पवित्र बज्राचार्यं ३ नम्वर प्रदेशया भाषा विधेयक ड्राफ्ट यानादीम्ह प्रा. डा. ओमकारेश्वर श्रेष्ठयात हनादीगु खः । ज्याझ्वलय् मा. शैलेन्द्र बज्राचार्य, मा. पुकार महर्जनयात वय्क:पिंसं विभागीय मन्त्री जुयाः यानादीगु योगदानयात कदर याःगु खः। ज्याझ्वलय् वर्ल्ड रेकर्ड तःपिं कल्पना महर्जन व मेपिन्त हंगु खः ।
थुगु अधिवेशन तिगनी जूगु खः । अधिवेशनय् १५० म्ह सिबें प्रतिनिधिं ब्वति काःगु सीदूगु दु ।