नेसं ११४५ चिल्लागा १३, येँ । नेवा: न्ह्यलुवाःपिंसं थःपिं राजसंस्थाया पक्षय् मदूगु स्पष्ट याःगु दु । नीप्यम्ह नेवाः न्ह्यलुवाःपिंसं मंकाः वक्तव्य जारी यानाः थःपिनि धारणा सार्वजनिक याःगु खः । राजनीतिक दलय् अावद्ध जुयामच्वंपिं व नेपाली कांग्रेस, नेकपा एमाले, नेकपा माओवादी केन्द्र, नेपाल समाजवादी पार्टी (नयाँ शक्ति), जसपाय् अावद्ध जुयाच्वंपिं नेवाः न्ह्यलुवाःपिंसं थुगु वक्तव्य ल्हाःचिं तयातःगु खः ।
वक्तव्यय् संघीयता, गणतन्त्र, धर्मनिरपेक्षता, समानुपातिक प्रतिनिधित्व, समावेशी लोकतन्त्रया पक्षय् थःपिं दूगु धयातःगु दु । लिसें संघीयता खारेजी, राजतन्त्र व हिन्दु राष्ट्र पुनर्स्थापनाया माग यानाः न्ह्याकाच्वंगु प्रतिगामीतय् गतिविधी थःपिन्त स्वीकार मजूगु धयातःगु दु । नेवाःतय् मूनखःबलय् छुंनंकथंया अवाञ्छनीय गतिविधि मन्ह्याकेत वक्तव्यय् खवरदारी यानातःगु दु । नेवाः लिसें अामजनताया असन्तोषयात इमान्दार जुयाः सम्वोधन यायेत राज्यसत्ता व राजनीतिक दलयात अपिल यानातःगु दु ।
