नेसं ११४५ बछलागा ११, तोखा । नेवाःत राजनीतिक सांगठनिक रूपं सशक्त मजूतले नेवाःतय् सम्मुचत अार्थिक जुइमखु, उकिं विश्व बजारयात ल्वयेक नेवाःतय्सं पारम्परिक व अाधुनिक उद्यम यायेमाः । थ्व खँ थौं जूगु संघीय नेपालया अार्थिक विकासय् नेवाःया भूमिका विषयक सहलह गोष्ठी सहभागीपिंसं निष्कर्श पिकानादीगु खः ।
गोष्ठी अनुप सिं सुवालं सहलहपौ न्ह्यब्वयादीगु खः । थुकी डा. बाबुराम भट्टराइ, प्रा. डा. अोमकारेश्वर श्रेष्ठ, सप्रा. डा. राजन लाल जोशी, हिसिला यमि, ३ नं प्रदेश सांसद शैलेन्द्र बज्राचार्य लगायतपिंसं सहलह ब्याकादीगु खः ।
सहलहपो न्ह्यब्वसें अनुप सिं सुवालं नेवातय्त शाह-राणाकालय् राज्यं मूलधारं तापाकातःगुलिं देश गुलि विकास जुइमाःगु खः उलि मजूगु धयादिल । वय्कलं नेवाःतय्के राष्ट्र निर्माण यायेगु क्षमता पुर्खां वःगु जूगुलिं राज्यया मूलधार, नेवाः राज्यया पलिस्था व देसय् प्रत्यक्ष निर्वाचित कार्यकारी प्रमुखया प्रावधान स्थापित यायेफःसा थःपिनिगु पालाय् समृद्धि हये फै धयादिल ।
डा. बाबुराम भट्टराइं नेवाः समुदाय जातीय समुदाय मखुसे राष्ट्र खः धयादिल । नेपाल न्हापा नं नेवाःतय्सं दयेकूगु खः, अाः नं नेवाःतय्सं हे अार्थिक क्रान्तिया नेतृत्व यायेमाः धयादिल ।
सप्रा डा. राजनलाल जोशीं नेवाःतय् अार्थिक विकासया लागिं राजनीतिक सोचय् थःपिं परिपक्व जुइमाःगु खँय् बः बियादिल । नेवाःतय्सं राजनीतिइ कुहाँ वयाः सांगठनिक व्यापकता हयाः अार्थिक क्रान्तिया नेतृत्व यायेमाः धयादिल ।
प्रा.डा. अोमकारेश्वर श्रेष्ठं देशया अापालं ख्यलं नेवाःयात विस्थापन यानायंकूगु खँय् च्यूताः प्वंकादिल । जातीया लिधंसा भूमि जुइगु व पहिचानया मूल अाधार भाय् जुइगु खँय् सचेत जुइमाःगु खँय् वय्कलं बः बियादिल । अार्थिक विकासया लागिं भूमि व भाय् प्रति नि संवेदनशील जुइमाःगु खँय् बः बियादिल ।
प्रदेश नं ३ या सांसद शैलेन्द्र बज्राचार्यं नेवाःत अाःतक नं अार्थिक नेतृत्व यायेत सक्षम जुयाच्वंगु दावी यानादिल । नेपालया अार्थिक विकास यायेत नेवाःत गम्भीर जुयाः अध्ययन यानाः बजारय् न्ह्यज्यायेमाःगु कनादिल । वय्कलं नेवाःतय् लागिं विश्व बजार चालाच्वंगु जूगुलिं थःत चकंका यंकेमाःगु खँय् बः बियादिल ।
सहलह गोष्ठीयात न्हुछेशोभा तुलाधरं लसकुस यानादीगु खः ।