नेसं ११४५ चौलाथ्व १, येँ । वंगु चैत्य १५ गते तीनकुने जूगु हिंसात्मक प्रदर्शनय् लानाः मदुम्ह पत्रकार सुरेश रजकया हत्याया विरोधय् थन धर्ना प्रदर्शन जूगु दु । येँया मरूइ महाद्यः पार्वती दबू परिसरय् पत्रकारपिं व मृतकया परिवारजन थुकथं धर्ना च्वंगु खः ।
नेवाः पत्रकार राष्टिय दबूपाखें ग्वसाः ग्वःगु थुगु धर्ना ज्याझ्वलय् पत्रकारपिन्सं हिंसात्मक गतिविधी संलग्नपिनि भर्त्सना याःगु खः । वक्तातयसं मृतक पत्रकारयात उचित सम्मान, छेँजःपिन्त क्षतिपूर्ति, पत्रकारतय् सुरक्षाया प्रत्याभूतिया माग याःगु दु ।
मदुम्ह पत्रकार रजक तीनकुनेय् एभिन्युज टेलिभिजनया लागिं रिपोर्टिंग यानाच्वंगु छेँय् प्रदर्शनकारीतय्सं च्याकाब्युसेंलि अन सिनाच्वंगु अवस्थाय् लूगु खः ।