नेसं ११४५ पाहाँचःह्रे, येँ । नेपालभाषाया न्हूगु म्युजिक भिडियो ‘लिफ: लिफ: तुला:’ या पितब्वज्या जुल । रमेश महर्जनं थम्हं म्ये च्वयाः पाहाँचःह्रे नखःया लसताय् थ्व म्ये न्ह्यब्वयादीगु खः । ३ नम्वर प्रदेशया सांसद समिता खड्गी श्रेष्ठं थुगु म्युजिक भिडियो औपचारिक पितब्वयादीगु खः ।
ज्याझ्वःया विशेष पाहाँ भुवन श्रेष्ठं थुगु म्येया युट्युव प्रिमियरया घोषणा यानादिल । संसार्स अनलाइन टिभीया च्यानलय् थुगु म्ये तयातःगु खः ।
ज्याझ्वलय् रचनाकार रमेश महर्जनं लसकुस यानादीगु खः । नेपालभाषाया म्ये ख्यलय् योगदान बीत थम्हं थ्व म्ये न्ह्यब्वयागु वय्कलं कनादीगु दु ।
येँ महानगरपालिका–१७ या वडा अध्यक्ष नविन मानन्धरं थःगु त्वाःयाम्ह छम्ह प्रतिष्ठित वकिलं नेपालभाषाया सेवा यायेत थुकथंया योगदान ब्यूगुलिं लसता प्वंकुसें म्येया लोकप्रियताया लागिं भिंतुना दिल । वय्कलं थ्व म्येया प्रचार-प्रसार सकस्यां यायेमाःगु खँय् बःब्युसें नेपालभाषा संगीतया संरक्षण व प्रवर्द्धनय् योगदान बिइत इनाप यानादिल ।
अनुप सिं सुवालं म्येया बाँलाःगु पक्षया सह्राहनिय यानादिसें नेपालभाषाया म्येया बजार मगाःगुलिं लगानी यायेत निर्माता ग्याइगु स्वाभाविक खः धयादिल । म्ये निर्माण यायेबबलय् प्राविधिक पक्षयात ध्यानय् तयाः मानकया ध्यान तयेमाःगु खँय् बःबियादिल । पेशां वकिल जुम्हेसिके नं मानविय सम्वेदना, करुणा, रस दैगु व उकिया स्यल्लाक अभिव्यञ्जन जुइगुया दसु थ्व म्ये जूगु धयादिल ।
ज्याझ्वलय् मूपाहाँ सांसद खड्गीं रचनाकार रमेश महर्जनयात वकिलकथं जक म्हस्यूगु व वय्कःया सिर्जनात्मक पक्ष नं उत्कृष्ट जूगु धयादिल । स्थानीय भाषा, संस्कृति व कलाया प्रवर्द्धनय् थ्व म्येया पुचलं याःगु ज्याया वय्कलं च्वछायादिल । वय्कलं ३ नम्वर प्रदेश सरकारं नेपालभाषा व तामाङ भाषाया अनुवादकया माग याःगुलिं थुकी नेवाःतय्सं च्यूताः प्वंकेत इनाप यानादिल ।
म्ये निर्माण याःगु पुचःयात सांसद समिता खड्गी श्रेष्ठ व वरिष्ठ डान्स डाइरेक्टर भुवन श्रेष्ठं लुमन्ति चिं लःल्हानादीगु खः ।
ज्याझ्वः मनरा प्रजापतिं न्ह्याकादीगु खः ।
म्युजिक भिडियोया निर्देशन राजु महर्जन व सुष्मा सिंहं यानादीगु खः । निर्माण तारा देवी महर्जनं यानादीगु खः । किशोर कुमार शाही व दीपा महर्जनं म्ये हालादीगु खः । संगीत शिव शाहीं बियादीगु खः । रविन्द्र महर्जन व रेश्मा महर्जनं अभिनय यानादीगु दु । नृत्य निर्देशन सुष्मा सिंहं यानादीगु खः । छायांकन धर्म मानन्धर, सम्पादन विमल मानन्धरव अतिथि सम्पादन बालकृष्ण बंसीं यानादीगु खः
थुगु म्युजिक भिडियो स्वकुमिं ययेकीगु भलसा कयातःगु दु ।
थ्व म्ये संसार्स् अनलाइन टिभीया युट्युब च्यानलय्मा स्वये फै ।