नेसं ११४५ चिल्लागा ८, यल । ३ नम्वर प्रदेशं “संघियता सबलीकरणमा प्रदेश तथा स्थानीय तहका सवालहरु” विषयसं सहलह ज्याझ्वः यात । ३ नम्वर प्रदेश सरकारया मुख्यमन्त्री तथा मन्त्री परिषद्या ज्याकु या ग्वसालय् थ्व ज्याझ्वः जूगु खः ।
ज्याझ्वःलय् राष्ट्रिय सभाया पूर्व सांसद डा. खिमलाल देवकोटां कार्यपत्र न्ह्यब्वयादीगु खः । थुगु कार्यपत्रयात कयाः ३ नम्वर प्रदेश सरकारया आन्तरिक मामिला तथा कानून मन्त्री सुरज चन्द्र लामिछाने व ललितपुर महानगर प्रमुख चिरीबाबु महर्जनं टिप्पणि यानादिल ।
कार्यपत्रय् राज्यं संघीयता अवलम्बन याये धुंकाः नेपाःया लैंगिक, समावेशी लगायतया अभ्यास विश्वया तुलनाय् बाँलाःगु अवस्थाय् दुगु न्ह्यथनातःगु दु । थुकिया कार्यान्वयन पक्षय् यक्व सुधार यायेमागु धयातःगु दु । ज्याझ्वलय् ब्वति काःपिंसं संघीयता सबलीकरणय् व्यवहारिक रुपं खनेदुगु पंग चीकेत माःगु नीति दयेकेमाःगु व नितिगत व कार्यान्वयन पक्षया दथुइ दूगु गाः यात म्ह्व यायेमाःगु विचाः तःगु खः ।
ज्याझ्वलय् मुख्यमन्त्री बहादुर सिंह लामां संघीय सरकार व स्थानीय निकाय जक दःसा गाः, प्रदेश सरकार आवश्यक मजू धैगु भाष्य गनंगनं वयाच्वंगु खँ न्ह्यथंसें प्रदेश सरकारया अवस्था संघ व स्थानीय निकायया दुथुया ताँ या जवंखंवया बार लिसे तुलना यानादिल । वय्कलं संंघीय सरकार व स्थानीय सरकारं प्रदेश सरकारयात ज्या यायेत ग्वाहालि याःसा देश धिसिलाक्क न्ह्याःवने फइ धयादिल ।
ज्याझ्व: मुख्यमन्त्री लामाया सभापतित्वय् जुगु खः। ज्याझ्वलय् संघीय संसदया सभामुख देवराज घिमिरें मूपाहाँकथं, लिसें उपसभामुख इन्दिरा रानाभाट, थीथी पार्टीया सचेतकपिंसं पाहाँ कथं ब्वति काःगु खः । संघीय सांसदपिं, प्रदेश सांसदपिं, थीथी महानगर व नगर पालिकाया प्रमुख उपप्रमुखपिं, पत्रकार व बुद्धिजिवीपिनिगु नं ज्याझ्वलय् उपस्थिति दूगु ख ।
