नेसं ११४५ बछलागा १०, हेटौंडा । ३ नम्वर प्रदेश संसदय् सांसद समिता खड्गी श्रेष्ठं थौं हाकनं नेवाः भासं थःगु सम्वोधन यानादीगु दु । प्रदेश सरकारं संसदय् नेपालभाषा व तामाङ भाषां अनुवाद याइपिं अनुवादकया व्यवस्था याःगुलिं लसता प्वंकुसें सांसद खड्गी श्रेष्ठं सरकारयात सुभाय् बियादीगु ख:।
सांसद खड्गी श्रेष्ठं संसदय् नवानाच्वँच्वं हे अनुवादया व्यवस्था जूसा जक थःगु भासं नवाइपिन्त सहज जुइगु धयादीगु दु । वय्कलं नवानाच्वंबलय् फ्लोरं भाय् मथूगु खँ धयाच्वंगु तायेवं वय्कलं खँय् भासं नं नवानादीगु खः । प्रदेशय् भाषा अधिकार व उपलव्धियात संस्थागत यायेत मेपिं सांसदं नं थःथःगु भासं नवाःसा संसदया गरिमा थाहाँवनीगु वय्कलं धयादीगु दु ।
३ नं प्रदेश सरकारं छुं वा न्ह्यव संसदय् जूगु सम्वोधनयात लिपिवद्ध यायेत नेवाः व ताामाङ भासं अनुवादकया व्यवस्था याःगु खः । लुमंकेबहजू, थुगु ज्या ताःलाकेत सांसद खड्गी श्रेष्ठं निरन्तर पैरवी यानादीगु खः ।